أنا سهيلة أباظة

حبيت اسم البراند يكون جزء من اسمي علشان يكون مختلف، ويديني إحساس بالانتماء لكل قطعة كروشيه بقرر أبدأ فيها، فبتكون جزء مني بعد ما بتخلص.

اتعلمت الكروشيه من مامتي اللي اتعلمته من جدتي وهكذا… فدي مش بس حكايتي، دي حكاية عيلة كاملة شغفهم إنهم يصنعوا أشياء بسيطة معمولة بكل حب ومجهود، ويهدوها لأعز الناس.

الكروشيه عمره ما كان مجرد غرزة، كل غرزة فيها ذكرى. كروشيه يعني ماما، وشغل ماما، وقعدة معاها بالإبرة والخيط، وكوباية الشاي باللبن.

الكروشيه دفاية قلب، ومراية صبر، ولحظات كتيرة محدش بيحس بيها غيرنا.